ອົດສະຕຣາລີ ໃຫ້ທຶນຊ່ວຍເຫຼືອ 21,000 ໂດລາອົດສະຕຣາລີ ແກ່ ໜ່ວຍກູ້ໄພນະຄອນຫຼວງວຽງຈັນ
ສະຖານທູດ ອົດສະຕຣາລີ ປະຈຳ ນະຄອນຫຼວງວຽງຈັນ ໄດ້ມອບທຶນຊ່ວຍເຫຼືອ ຈຳນວນ 21,000 ໂດລາອົດສະຕຣາລີ (ຫຼື ປະມານ 130 ລ້ານກີບ) ໃຫ້ແກ່ ໜ່ວຍກູ້ໄພນະຄອນຫຼວງວຽງຈັນ ໃນວັນທີ 4 ມີນາ 2015. ທຶນຊ່ວຍ ເຫຼືອດັ່ງກ່າວ ແມ່ນ ມາຈາກໂຄງການຊ່ວຍເຫຼືອໂດຍກົງ (ຫຼື Direct Aid Program) ຂອງ ສະຖານທູດ ອົດສະຕຣາລີ. ທຶນຊ່ວຍເຫລືອນີ້ ຈະໄດ້ຖືກນຳໃຊ້ເຂົ້າໃນ ການຝຶກອົບຮົມກ່ຽວກັບ ການປະຖົມພະຍາບານ ຂັ້ນພື້ນຖານ ໃຫ້ແກ່ ອາສາສະໝັກຂອງໜ່ວຍກູ້ໄພ ແລະ ເພື່ອຈັດຊື້ອຸປະກອນ ທີ່ຈຳເປັນ ສຳລັບເຫດການສຸກເສີນ.
ໃນຊ່ວງເລີ່ມຕົ້ນ ໜ່ວຍກູ້ໄພນະຄອນຫຼວງວຽງຈັນ ມີ ອາສາສະໝັກ ປະມານ 7 ຄົນ, ແຕ່ ໃນປະຈຸບັນໄດ້ມີຈຳນວນເພີ່ມຂຶ້ນ ຫຼາຍກ່ວາ 70 ຄົນ. ໜ່ວຍງານດັ່ງກ່າວ ໄດ້ປະຕິບັດໜ້າທີ່ ຕະຫຼອດ 24 ຊົ່ວໂມງ ຂອງທຸກໆ ມື້, ເຊິ່ງມີລົດກູ້ໄພ 5 ຄັນ ແລະ ມີຫ້ອງການ ຢູ່ສອງບ່ອນ, ເຊິ່ງເຮັດໃຫ້ພວກເຂົາເຈົ້າ ສາມາດ ໄປຮອດສະຖານທີ່ເກີດອຸປະຕິເຫດ ໄດ້ຢ່າງວ່ອງໄວ. ທີມງານຂອງ ໜ່ວຍກູ້ໄພ ດັ່ງກ່າວ ໄດ້ສະແດງໃຫ້ເຫັນເຖິງ ຄວາມຫ້າວຫັນ ແລະ ຄວາມຕັ້ງໃຈ ຂອງ ອາສາສະໝັກ ທີ່ເສຍສະລະເວລາຫວ່າງ ຂອງຕົນເອງ ເພື່ອຊ່ວຍເຫຼືອ ຄົນອື່ນ ແລະ ຊ່ວຍຊີວິດຂອງ ຜູ້ເຄາະຮ້າຍ.
ສອບຖາມຂໍ້ມູນເພີ່ມຕື່ມທີ່: ມິ່ງງາຄຳ ປັນຍາສັກ, ຜູ້ຮັບຜິດຊອບ ຊື່ມວນຊົນ ແລະ ຂ່າວສານ, ສະຖານທູດອົດສະຕຣາລີ, ໂທ: 021 353 800 ຕໍ່ 125, ມືຖື 020 2223 8299